Curaclum
Aistear
Is creatchuraclam luath-óige do pháistí uile na hÉireann ó bhreith go sé bliana é Aistear. Tá faisnéis ann do dhaoine fásta chun cuidiú leo eispéiris thaitneamhacha dhúshlánacha a phleanáil agus a sholáthar, le go mbeidh gach páiste ina fhoghlaimeoir inniúil féinmhuiníneach agus caidrimh ghrámhara le daoine eile á gcothú aige. Le hAistear, déantar cur síos ar na cineálacha foghlama (meonta, luachanna agus dearcadh, scileanna, feasacht agus tuiscint) atá tábhachtach don pháiste i mblianta na luathóige, agus tá tuairimí agus moltaí ann maidir le conas an fhoghlaim seo a chothú.
Spórt agus Cúrsaí Folláine
Déanann na páistí corpoideachas agus damhsa gaelach. Is breá linn am a chaitheamh amuigh faoin aer – siúlóidí dúlra agus siúlóidí chuig an leabharlann áitiúil.
Tá páirtnéireacht idir Gaelscoil Laighean agus an Cumann Lúthcleas Gael agus baineann na páistí leas agus taitneamh as an gcóitseáil a cuirtear ar fáil dóibh ó Chlub Chill Mochuda na Crócaigh.
Ceol, Drámaíocht agus na hAmharcealaíon
Cuireann an curaclam ar chumas páistí smaointe, mothúcháin agus eispéiris a chur in iúl go healaíonta trí mheán an cheoil, na drámaíochta agus na n-amharcealaíon. Tugtar túseolas do pháistí ar conas ceol a léamh agus a scríobh, amhráin a chanadh agus uirlisí ceoil ranga a sheinm.
Tugann an drámaíocht deis do gach uile pháiste a bheith rannpháirteach agus rathúil san fhoghlaim. Tógtar muinín na bpáistí agus cruthaítear draíocht.
Cuireann gníomhaíochtaí sna hamharcealaíona ar chumas na bpáistí ciall a bhaint as a ndomhan agus é a léiriú i bhfoirm infheicthe inbhraite.
Dátheangachas
Séard atá i gceist le dátheangachas ná dhá theanga a bheith ar do thoil agat. Beidh inniúlacht cainte sa Bhéarla agus sa Ghaeilge ag páistí a fhreastalaíonn ar Ghaelscoil Laighean.
Léiríonn an taighde atá déanta ar oideachas dátheangach:
Go n-éiríonn níos fearr go hacadúil leis na páistí a théann tríd an gcóras
Go mbíonn sé níos éasca orthu teangacha eile a fhoghlaim
Go mbaineann siad marcanna níos fearr amach sa Bhéarla agus sa Mhatamaitic
Go mbíonn oscailteacht do chultúir eile acu.
Ilteangachas
Beidh an córas Foghlaim Chomhtháite Ábhar agus Teangacha (‘FCÁT’/ Content & language integrated learning system, ‘CLIL’)a chur i bhfeidhm i nGaelscoil Laighean mar a dhéantar ar fud na hEorpa agus mar sin buntáistí breise a thabhairt dár daltaí.
Fís ó Chomhdháil 2017 an Foras Pátrúnachta https://youtu.be/wY07qDMGGtU